Спасовски во Крива Паланка: Инвестираме во стручна, опремена и ефикасна полиција

Реконструкцијата на објектот на ОВР Крива Паланка, кој се реновира по цели 30 години, чини околу 9 милиони денари, обезбедени од МВР, а градежните работи се при крај. Санацијата на градежниот објект е завршена за само два месеци, а градежно- занаетчиските работи опфаќаат санација на кровната конструкција, комплетна замена на старите дрвени прозорци со нови ПВЦ прозорци, замена и санација на внатрешните врати, како и на подрумските и просториите за приведување. Изработена е и комплетно нова фасада и нов пристап за управните служби, каде е поставена и пристапна рампа за лицата со физичка попреченост, како и мерки за енергетска ефикасност и за заштита на животната средина.

-Очекувам сето ова да придонесе за што поквалитетно професионално извршување на работните задачи и активности на вработените во ОВР Крива Паланка и уште поуспешни резултати во сите сегменти од нивната надлежност, - посочи министерот Спасовски.

Тој истакна дека во изминативе четири месеци реконструирани се и Полициско одделение Жеровјане, ОВР Кавадарци,а во тек се реконструкциите на ОВР Гевгелија, Регионален центар Југ и Полициска станица Бит Пазар. Спасовски ги промовираше и петте набавени пловни објекти за зголемување на ефикасноста на езерската полиција.

Истовремено, посочи дека се набавуваат и униформи и опрема за полициските службеници, сѐ со цел создавање модерна, опремена, стручна и ефикасна полиција, која ќе биде блиска до граѓаните.

Во придружба на министерот Спасовски беа и вицепремиерот за борба против корупцијата Љупчо Николовски и заменик директорот на Бирото за јавна безбедност Ариф Асани. Тие им ја честитаа Новата 2021 на полициските службеници и на кривопаланчани и положија свежо цвеќе пред споменикот на загинатите припадници на полицијата во конфликот од 2001 година.

(Ж.Ц.)