Средното училиште „Ѓорче Петров“ од Крива Паланка го одбележа 60-годишниот јубилеј

На свечената академија беа потенцирани успесите и постигнувањата на највисоката образовна установа во Крива Паланка, која денес е современо училиште кое успешно се носи со најдобрите училишта во државата.

„Работата на просветните работници е благородна. Ги образуваме, воспитуваме и едуцираме учениците да бидат успешни личности. Последните 3 години во училиштето се инвестираше многу во дигитализација на образовниот процес, организираме обуки за професионален развој на наставниот кадар и учествуваме на многу натпревари во државата и во меѓународни рамки, каде бележиме завидни успеси и резултати“, истакна директорката на СОУ „Ѓорче Петров“, Габриела Стаменковска.

На свеченоста присуствуваа и некогашни ученици, политичарот Тито Петковски и Љупчо Николовски. Петковски е дел од првата генерација на “Ѓорче Петров“ во 1960 година и истакнува дека тогашните средношколци биле носители на општествено-културниот развој на општината. Николовски, пак, вели дека во ова училиште почнал да ги пишува своите први говори, кои му помогнале понатаму во професијата на политичар.

Градоначалникот на Крива Паланка, Борјанчо Мицевски, го честиташе јубилејот и посака училиштето и понатаму да продолжи со образовниот развој и нови успешни генерации.

„За да се стаса до средното образование во општината, претстоела 100- годишна битка за одобрување на повисок образовен статус во Крива Паланка. Чест гостин сум во училиштето, ги поддржувам и како општина ги стимулираме учениците да стекнуваат нови знаења заедно со учениците од европските држави“, подвлече Мицевски.

(Ж.Ц)