Зачленете се во нашиот клуб на читатели и најновите текстови ќе ги добивате на вашата мејл адреса
Започнаа градежните работи за поправка, проширување и тампонирање на патот до манастирскиот комплекс Карпино во Сув Ора, Општина Старо Нагоричане. Санацијата ќе биде во должина од 2.400 метри, а се очекува да заврши во наредни десетина дена, иако договорот предвидува да се предаде во употреба на 30 ноември.
„Изведувачот не теренот со тешка механизација и очекуваме работите да бидат завршени за десетина дена. Горди сме на овој проект, затоа што ќе се направи пристапен пат до манастирот Карпино, што значи и збогатување на туристичката понуда на крајот. Секако за населението и верниците е од исклучителна важност овој објект“, изјави Бобан Цветановски, градоначалник на Општина Старо Нагоричане.
Патот е тешко прооден поради големите оштетувања, дури и за теренски возила и џипови, па со поправката се очекува посетителите да можат со сопствени возила да стигнат до Карпино, важен културно-историски објект, кој е сместен во недопрена природа.
Преку Бирото за рамномерен развој се обезбедени 3,5 милиони денари, за изведувач на работите е фирмата „Фишер-Тихи“ од Куманово. Од Здружението за заштита на манастирот Карпино најавуваат обновување и на конаците.
Манастирот Карпино е изграден во 14 век и е позната скрипторска школа од 16 век. Според податоците од Институтот за македонска книжевност, во манастирот Карпино живееле над 300 калуѓери и тој важел како црковно - духовно и културно јадро за овој регион. Оригиналните ракописи, кои сега се наоѓаат во Москва, Софија и во Белград, сведочат за препишувачката школа и за постоење на ќелијно училиште.
Скапоцената колекција на стари празнични икони се наоѓа во галеријата на икони во соборниот храм „Свети Никола” во Куманово.
Зачленете се во нашиот клуб на читатели и најновите текстови ќе ги добивате на вашата мејл адреса
