Семејната куќа и кафеаната „Крчма“ на Јован Манушевиќ – една од најубавите во предвоено Куманово

И денес погледот на секој минувач на Нагорички сокак се задржува на Манушевата куќа, подигната во 1929 година, со извонредно убави архитектонски белези. Браќата Јован и Васил Манушевиќ беа угледни и почитувани луѓе, сопственици на винарски подрум и на познатиот Манушев млин.

Браќата Манушеви играа значајна улога во кумановската чаршија и во трговскиот живот на градот. Тие се велешани, доселени во Куманово од Башино Село (велешко), во периодот меѓу Првата балканска и Првата светска војна. На почетокот се занимаваа со производство и продажба на ракија, вино и оцет, а подоцна отворија своја продавница. Беа богати, добри и вредни работници. 

Покрај со трговијата, овие наши сограѓани, се занимаваа и со лозарство, имаа свои лозја, познати како Манушеви, а се наоѓаа каде што е сега населбата „Бајрам Шабани“.

Тие, заедно со уште неколку свои пријатели, исто така богати трговци, ја изградија Мелницата „Жеглигово“. Подоцна Манушеви ќе ги откупат деловите на своите ортаци и тие ќе станат целосно сопственици на овој индустриски објект. Мелницата им беше одземена од страна на комунистичката власт, но постои и денес. Се наоѓа на Нагорички сокак. 

Автор. Филип Ѓошевски, научен соработник 

(Извор: А. Урошевић (1949) – Куманово, Годишен зборник на филозофскиот факултет, књ 2, 1949, стр. 30 М. Арсовски Болто – Нагорички сокак – своевиден белег на старо Куманово, 2006, стр. 3411-3417.П. Трајковски – Старо Куманово (луѓе – обичаи – настани), стр, 79, Куманово, 1997.)