Куманово ја забележа првата победа во Еврокупот

Куманово го доби натпреварот во втората четвртина, која успеја да ја добие со резултат 23-6. Првата четвртина донесе неизвесност, меѓутоа во вториот период кумановчани целосно го демолираа противникиот и решавајки го победникот во овој меч.

Гостите од Финска успејаа до крајот на мечот ја топеа разликата, меѓутоа ниту еднаш не дојде до прашање кој ќе биде победникот на овој меч.

Урош Луковиќ и Александар Костовски беа најефикасни на овој натпревар. Центарот на Куманово постигна 24 поени и 10 скока, додека репрезентативниот плеј го заврши натпреварот со 25 поени и 6 асистенции.

Тимот од Финска допатува со девет кошаркари од кои Александар Херера и Дивон Гилс постигнаа по 13 поени.

Луковиќ: Победа на играчите и навивачите на Куманово

Тренерот на Куманово Љубисав Луковиќ истакна дека ова е победа на Куманово на Европската сцена по шеснаесет години. Потенцираше дека покрај играчите, голема заслуга имаат и навивачите за оваа победа.

Можеби ова не е наш најдобар натпревар во последните неколку месеци, но верувам дека играме се подобро и подобро. Им се заблагодарувам на моите играчи, на Кумани и сите останати фанови во салата. Мислам дека Куманово ќе биде изненадување во овој куп - изјави по натпреварот тренерот Љубисав Луковиќ

Миролибов: Имате шанси против КТП

Тренерот на гостите им ја честиташе заслужената победа на Куманово.

Честитки за победата и одличната атмосера. Влеговте поагресивно во овој меч, ние не искористивме некои ситуации еден на еден и промашивме многу слободни фрлања. Во второто полувреме пробавме да се вратиме, игравме подобро меѓутоа неуспешно - изјави Антон Миролибов, тренер на КТП.

На новинарско прашање, тој посочи дека Куманово има што да бара во натпреварот против Роса Радом.

Ние имавме слаб настап на домашен терен. Доколку игравме како денеска во второто полувреме мислам дека ќе победевме во тој натпревар. Роса Радом е слична екипа како вас, имаат Американци на плејмејкерската и бековската позиција. Со ваква игра сигурно дека можете да се надевате на позитивен резултат - додате Миролибов