Пинк Пантери гостуваа во Москва

Со тоа се продолжува со исполнување на претходно зацртаните планови на клубот и константно гостување и одигрување на квалитетни натпревари  со познати европски клубови.

По соработката со Бенетон Тревизо, Фенербахче Истанбул и Барселона во изминатите неколку месеци, сега на ред дојде и гостувањето во Москва. Таму кумановските кошаркари одиграа два натпревара. Едниот против екипата на домаќинот ЦСКА и вториот против нивниот братски клуб екипата на Тринта.

Првиот натпревар одигран против екипата на ЦСКА Москва кој се одигра во петок во салата на нивниот тренинг центар заврши со победа на домаќинот од 84-65. Вториот натпревар се одигра во саботата во спортскиот центар на Тринта против истоимената екипа и тој натпревар заврши со победа на домаќинот од 81-62. Резултатите од двата натпревара сепак беа во втор план, а младите кошаркари на Пинк Пантери имаа уште едно меѓународно искуство, и можност да видат до каде се во споредба со нивните врсници од Русија - изјави Бојан Златковски, директор на Пинк Пантери.

Во тие неколку дена поминати во Москва децата имаа можност и да го проследат тренингот на првата екипа на ЦСКА, а во петок во живо го проследија и натпреварот од евролигата помеѓу домаќинот ЦСКА и Дарусафака од Турција. Слободното време кумановскиот тим го искористи и за прошетка низ градот Москва. Со луѓето од ЦСКА е договорено соработката да продолжи и понатаму. За нас како клуб кој постои седум години е вистинско задоволство и привилегија што во изминатиот период нашите деца имаа можност да играат квалитетни меѓународни натпревари против познати европски екипи.

Со прикажаните игри на тие натпревари на достоен начин ја презентираме македонската кошарка надвор од нашите граници. Тој тренд на гостување ке продолжи и понатаму, се со цел децата да се стекнат со непроценливо искуство кое многу ке им значи за понатамошниот развој на нивните кошаркарски кариери.

Во наредниот период Пинк Пантери треба да гостуваат и во Изрел, каде ке бидат гости на повеќекратниот европски првак Макаби Телавив, со кој ке одиграат неколку натпревари. А веќе во почетокот на месец февруари договорено е гостување во Загреб каде ке бидат одиграни натпревари со екипите на Цибона и Цедевита.