1,5 милиони денари за заштита на манастирската црква во Матејче од Министерството за култура

„ Манастирот е еден од најрепрезентативните споменици на византиската уметност во нашата земја и ќе биде заштитен како културно наследство во опасност. Потоа ќе продолжиме со реставрација на  манастирскиот комплекс за зачување на Матејче и запирање на понатамошните кражби во што се вклучени и општините Липково и Куманово“, истакна министерката за култура Бисера Костадиновска-Стојчевска на  прес конференција на која информираше за резултатите од годишните конкурси за поддршка на проекти.

 Притоа, информираше дека истовремено  Министерството за транспорт и врски работи на подготовка за санација на пристапниот пат до самиот манастир.  

Црквата „Успение на Пресвета Богородица“ во Матејче е еден од најзначајните објекти во Македонија и ваквата грандиозна и велелепна архитектура може да се спореди само со црквата „Света Софија“ во Охрид. Изградена е во 1362 година, а нејзин ктитор е цар Душан. Таа во себе го содржи најголемиот насликан ансамбл од 14 век на македонската територија и е еден од најрепрезентативните споменици на византиската уметност на македонска почва и ремек-дело на дворскиот стил кој што бил карактеристичен за епохата на Палеолозите. 
За жал,во воениот конфликт од 2001 година, голем дел од црквата беше уништен, фреските оштетени, а одмаралиштето разурнато и запалено. По завршување на конфликтот направена е сериозна конзервација и црквата е доведена во состојба во која можеше да функционира, а во 2021 година со средства во висина од еден милион денари од  Министерството за култура  беа спроведени интервенции на архитектурата,  ѕидното сликарство на црквата и реконструкција на камбанаријата.  Меѓутоа нејзиното уништување продолжува и понатаму. Вандали постојано ги кршат влезните врати и прозорците, откорнати се  оловни плочи од кровот, па атмофереските влијанија дополнително го уништуваат фрескоживописот и внатрешноста на објектот.