Британија ја одобри вакцината против ковид-19 на „Фајзер“, имунизацијата почнува следната недела

Имунизацијата би можела да почне за неколку дена и вакцината прво ќе ја примат високоприоритетните групи, во кои спаѓаат жителите на старечки домови, луѓето над 80 години и здравствените лица, пренесува СДК.мк.

Велика Британија има нарачано 40 милиони дози од оваа вакцина, што е доволно да се вакцинираат 20 милиони луѓе, бидејќи е потребно секој да прими по две дози. Првите дози ќе пристигнат во земјата во наредните неколку дена.

Ова е најбрзо развиената вакцина во историјата, имајќи предвид дека од концептот до реализацијата поминаа само 10 месеци. Вообичаено, развојот трае и цела деценија.

Вакцината на „Фајзер“ и „Бионтек“ користи целосно експериментален пристап: вбризгување на дел од генетскиот код на вирусот, со цел да го тренира имунолошкиот систем, кој потоа произведува антитела и активира Т-клетки за да ги уништи заразените клетки. Потребни се две дози, примени со три недели растојание.

Од владата предупредуваат дека иако наскоро ќе почне вакцинирањето, луѓето треба да останат претпазливи и да продолжат да се придржуваат до воведените мерки.