Зачленете се во нашиот клуб на читатели и најновите текстови ќе ги добивате на вашата мејл адреса
Советниците денеска го изгласаа правилникот за определување на критериумите и условите кои треба да се исполнат, за имплементирање на мерките за обезбедување поддршка за подобрување на енергетската ефикаснот во колективното домување во Куманово.
Посебна комисија ќе се формира и ќе ги разгледува барањата на оние кои се заинтересирани за вклучување во проектот. Советникот Ашмет Османовски од Коалицијата За подобра Македонија, вели дека граѓаните треба да ги искористат поволностите на овој проект, каде Хабитат Македонија ќе учествува со 80 отсто, а општината со 20 отсто. Ќе се замени надворешна столарија, покрив, фасада со што зградите ќе добијат нов лик.
Овој проект е во интерес на самите граѓани и за општината која ќе добие поинаков изглед. Особено во централното градско подрачје, згради кои се поодамна изградени и нивните фасади се во фаза на распаѓање. Правилникот ќе профункционира ако има интерес од граѓаните - вели Османовски.
Горан Митевски, раководител на сектор за меѓународна соработка и евроинтеграции во општината, вели дека проектот ќе се реализира првенствено во центарот на градот.
Може да биде опфатен и поширок дел од Куманово, во зависност од интересот на станарите. Што се однесува на правилата, важно е дека општината гарантира дека 20 отсто од вредноста на заедничките простории, на фасадата и на покривот ќе ги обезбеди и ќе учествува во самото финансирање, изградба и реконструкција - рече Митевски.
Советниците ја спомнаа и статиката на зградите, на што Митевски вели дека опасност по статиката на зградите нема и не би требало да има.
Зачленете се во нашиот клуб на читатели и најновите текстови ќе ги добивате на вашата мејл адреса
