Две години меѓуетничка интеграција во “Христијан Карпош“

Учениците ја изведоа претставата “Снежана и седумте џуџиња“, а воедно на  штандови ја презентираа својата работа. Професорите велат дека овој проект придонесува за толеранција, разбирање и соживот меѓу учениците од различни националности.

Ние ги победивме предрасудите и стереотипите. Покажавме дека можеме и денеска ќе ви презентираме како тоа може да се направи во сите сегменти на општественото живеење. Завршува една етапа и почнува друга етапа, и искрено се надевам дека и другите ќе не поддржат во нашата заложба - изјави Даниела Стојановска, координатор на проектот во „Христијан Карпош“.

Бесник Ибраими, кординатор  од „7 март“ вели дека целта на овој проект поддржан од УСАИД,  е да ги зближи децата со нивните врсници од друга националност.

Децата да научат друг јазик освен мајчиниот. На пример македонскиот и од македонска страна да научат некој збор албански. Имавме досега прошетка во природа кај Липковска брана, драматизација на „Снежана и седумте џуџиња“, цртежи и течат работите најдобро што може - кажа Ибраими.

Директорката на “Христијан Карпош“, Лидија Костиќ вели дека оваа заедничка приредба е круна на она што досега е сработено.

Сигурно се планира и понатамошна соработка затоа што и во колективот веќе се створи да има позитивно искуство и сакаат сите  да се вклучат. Ние сме големо училиште има околу 70 вработени наставници и сите сакаат повторно да се вклучат во овој проект. Сигурно ќе има позитивен фидбек и од другото училиште и ќе продолжиме со соработка - вели Костиќ.

Приредбата ја проследија наставници, директори од други училишта, претставници од општина Куманово, родители и други гости. Проектот за меѓуетничка интеграција во образованието се спроведува и во останатите училишта во општина Куманово.