Зачленете се во нашиот клуб на читатели и најновите текстови ќе ги добивате на вашата мејл адреса
Со изложби, промоции, проекции на филмови и едукативни работилници Кумановскиот музеј ќе ги одбележи Деновите на европско културно наследство, кои се одржуваат од денеска до 28 септември.
Овогодинешното одбележување ќе биде под мото „Одржливо наследство“.
„Националната установа Музеј Куманово оваа година се вклучува кон оваа иницијатива со
организирање на бројни настани и со богата агенда. Активностите започнуваат од денеска, четврток, во Гимназија “Гоце Делчев” со проекција на етнолошки филм “Мека душа за тврдо железо” од авторите Надица Петковиќ и Валентина Илијевска. Утре во истото училиште ќе бидат прикажани и етнолошките филмови “Ориентални влијанија на поствизантиските цркви во Кумановско” и “Двојните цркви во Кумановско од поствизантиски период XVI-XVII век” од авторот Валентина Андреиќ“, изјави директорката Мери Николиќ.
Активностите продолжуваат од понеделник со едукативни работилници ”Погледни во минатото, дизајнирај ја сегашноста” со ученици од ООУ „Крсте Мисирков“, во вторник вработените од Музејот ќе имаат работна посета на локалитетот Царичин град, општина Лебане и на Народниот Музеј во Лесковац.
Во среда на последниот ден ќе се организираат едукативни работилници ”Погледни во минатото, дизајнирај ја сегашноста” со ученици од ООУ „Кочо Рацин“ и ООУ „Браќа Миладиновци“, Куманово. Манифестацијата ќе заврши со ретроспективно-монографска изложба на Крсто Славковски од авторот Гоце Божурски во 20 часот во Уметничка Галерија Куманово.
Европските денови на културнотo наследство претставуваат нajшироко прифатен партиципативен културен настан којшто го споделуваат граѓаните на Европа. Со повеќе од 70.000 настани што се организираат во педесетте земји – потписнички на Европската културна конвенција, оваа сеевропска иницијатива има за цел да ја подигне свеста кај пошироката јавност за заедничкото - европско наследство. Во текот на повеќедецениската реализација, Европските денови на културното наследство пераснаа во најголем европски проект поврзан со наследството, којшто успешно ја промовира инклузивноста и ја поттикнува креативноста и имагинацијата на граѓаните на Европа.