Филиповски: Да се изготви стратегија за санирање на “Водовод“

„Водовод“ повеќе од една седмица е без струја, и не може да ги сервисира долговите, поради што директорот на Водостопанство, Филип Филиповски денеска на прес-конференција ги повика градоначалникот Зоран Дамјановски и директорот на „Водовод“, Горан Стојковски да изготват план за санација на претпријатијето, кое само на нив им должи 1,3 милиони евра.

„Главниот виковник Дамјановски молчи и не презема мерки во Советот на општината. Долгот кон Водостопанство перманентно се зголемува. Со неплаќање на долгот ја доведува во прашање и функционалноста на Водостопанство, доколку имаме големи загуби ќе се доведе во прашање контрола на испуштање на вода. Доколку се продолжи со ваков однос, ги доведувате и граѓаните и вработените во “Водовод“, и другите фирми кои соработуваат со “Водовод“ во незавидна состојба. Наша препорака е до Дамјановски и Стојковски што поскоро да се зафатат со решавање на оваа ситуација за што имаат законска обврска“ - вели Филиповски.

Филиповски објаснува дека она што претходно двете страни го договорија кај министерот за земјоделство Михаил Цветков, не е испочитувано од „Водовод“.

Од „Водовод“ велат долгот е направен со зголемување на цена на сирова вода во последните години за 300 пати.

Во министерство беше постигнат договор за цена на сирова вода од 4.5 денари без ДДВ, а тие фактурираат цела година по 6.5 денари. Ако се загрижени за нашето функционирање, треба да донесат одлука со која граѓаните на Куманово нема да плаќаат најскапа сирова вода во Македонија“ - рече Горан Стојковски, директор на „Водовод“.

Во меѓувреме „Водовод“ работи во отежнати услови, без струја во објектите.