Голманот Столе Димитриевски доби мурал во родното Куманово

Неговите сограѓани се горди што Димитриевски последните години е еден од најдобрите македонски голмани, а особено по историскиот успех на натпреварот против Италија, кога будно ја чуваше мрежата од противничката екипа.

Автори на муралот се младите уметници Дејвид Стоилковски и Младен Трендевски, а Здружението „Форма“ самоиницијативно и со сопствени средства го изработи ова дело, без никаква поддршка од институциите.

„Преку овој чин, сакавме да му заблагодариме и да му одадеме чест на нашиот Столе, кој не направи горди кумановци. Возбудата е голема пред утрешниот натпревар со Португалија во финалето на баражот за пласман на Светското првенство во Катар. Со овој мурал ја изразуваме нашата огромна поддршка за Димитриевски и македонската репрезентација, кои безрезерно ќе ги бодриме“, велат од „Форма“.

Муралот се наоѓа  пред влезот во населбата „Перо Чичо“ , и предизвика голем број позитивни реакции кај кумановци, кои утре ќе можат да го проследат натпреварот Македонија - Португалија преку видео бим на Градскиот плоштад.

Инаку, уметниците од Здружението за ликовна уметност „Форма“, кои често изненадуваат со разубавувањето на кумановските локации, најавија дека наскоро ќе се одржи и Фестивалот „Графит фест“, како и повеќе други проекти за уметничко обликување на урбаните единици во Куманово.