Горан Стојковски – Диро во трка за градоначалник на Куманово како независен кандидат

 Стојковски вели дека во завршна фаза е формирањето на тимот, а во наредните денови јавноста ќе биде запознаена и со кандидатите кои ќе се најдат на советничката листа. Носител на листата е стоматологот Иван Петковски.

„Секој успех бара тим, визија, дисциплина, работа и ред. Тим кој не прави компромис со вистината, тим составен од стручни, компетентни и луѓе со дигнитет и личен интегритет. Потребата за воспоставување ред и институционален систем е прашање на колективната културна и морална амбиција која денес во Куманово е целосно созреана. Потребата за таков општествен живот денес е јасна и на истата мора да биде одговорено. Квалитетен одговор не може да даде никој поединец туку само тим кој нема да држи говори туку веднаш ќе обезбеди веродостојна визија и функционални институции. При крај се разговорите со последните неколку потенцијални членови на тимот кој го формираме и во наредните денови јавноста ќе биде детално запознаена“, изјави Стојковски за Кумановоњуз.

Стојковски по професија е правник и работи во Секторот за урбанизам во Општина Куманово, два мандати беше директор на ЈП "Водовод", откако дојде од приватната фирма.

Стојковски е третиот кандидат за градоначалник на Куманово кој ја најави својата кандидатура, по партиските кандидати Максим Димитриевски од ЗНАМ и Мартин Костовски од СДСМ, а засега е прв независен кандидат.