Исклучен „бај пасот„ - Куманово пак без вода

Директорот на ЈП „Водовод„ Горан Стојковски  тврди дека Водостопанство Кумановско-Липковско поле не испорачува вода по т.н. „бај-пас„, по кој се обезбедуваат дополнителни количини на вода за градот во летниот период.

Од минатиот петок целосно е исклучен дотурот на вода по „бај-пасот„, а ние во меѓувреме ги потрошивме сите резерви на вода. Од вчера високата зона е без вода, а  во одредени делови од централното градско подрачје има намален притисок. По главниот вод во моментот добиваме од 150-180 литри во секунда вода, а за редовно снабдување се потребни најмалку 230 литри во секунда - изјави Стојковски.

Директорот вели дека се обиделе да разговараат со надлежните во Водостопанство, кои тврделе дека тие немаат врска со исклучување на алтернативниот цевковод.

 Вечерва се обидовме да го исконтактираме телефонски и директорот на Водостопанство Филип Филиповски, за да ја слушнеме другата страна од приказната, но безуспешно.

Ова не е првпат Куманово да се соочува со проблеми во водоснабдувањето поради кавги во двете водоснабдителни претпријатија во градот. Граѓаните се гневни и бараат што побрзо решавање на проблемот.