Изложба на слики на Марија Величковска во Куманово

Изложбата содржи 26 слики коишто се работени во изминатите три години и претставува нејзин трет тематски циклус на самостојно презентирање на најновата сликарска продукција. Проектот е финансиски подржан од Министерството за култура на Македонија.

Марија Величковска е родена 1974 година во Скопје. Средно уметничко училиште завршила во Скопје, отсек Применето сликарство.

Дипломирала на Факултетот за ликовни уметности во Скопје, во класата на проф. Родољуб Анастасов, со насока – „Дипломиран сликар со модно креирање“.

Имала голем број на изложби во земјава и странство.

„По двете реализирани изложби во НУ Центар за култура „Трајко Прокопиев“ – Куманово на академската сликарка Марија Величковска („Имагинации“ во 2011 година и „Импресии“ во 2016), повторно имаме можност за кратка анализа и запознавање на најновата продукција на сликарските остварувања на оваа авторка работени во периодот од последните три години (2019-21), со наслов „Распетие на светлината“. Меѓу другото во образложението на проектот, Марија ќе запише дека сликите од „Распетие на светлината“ ги работи под влијание на тешката атмосфера од ковид и постковид состојбите, па оттука разбирлив е и ликовниот ракопис и вокабулар во којшто доминира потрага за нова реалност, конструирана на сосема нови постулати и принципи. Можеби надежта и оптимизмот ќе ја врати легендата за жар-птицата којашто е тема на некои слики од овој циклус, легенда којашто е инспирација, по зборовите на Марија Величковска, за целата нејзина најнова поставка“, вели Роберт Цветковски, историчар на уметноста. 

Изложбата во Куманово ќе биде поставена до 22.12.2021.