Изложба “Стеги“ на Илија Струмениковски во Куманово

На изложбата ќе бидат поставени 20 слики работени во техниката акрил на хартија, кои претставуваат дел од најновата продукција на Струмениковски, кој живее и работи во Куманово.

Илија Струмениковски е роден 1940 година и зад себе има реализирано извонредна кариера како театарски, филмски и телевизиски актер. Се пензионира во 2005 година, а за својата работа има добиено повеќе награди и признанија.

Покрај актерството, тој педесетина години се занимава и со сликарство, остварувајќи 20-тина самостојни претставувања, како и учество на повеќе групни изложби.

Од своето последно јавно презентирање пред 9 години, па сè до денеска, авторот Илија Струмениковски остана верен на идејата дека уметноста може да го објасни светот, за што визуелно говори и во најновиот циклус “Стеги“.

„Развивајќи ја претходно поставената ликовна лексика, со пречистен цртеж и сложена просторно- контекстуална композиција, составена од веќе познати архетипски елементи ставени во една симбиоза која извира од центарот на сликата, Струмениковски цврсто опстојува на изворно поставениот концепт: перманентната интеракција помеѓу животот и неговото опкружување проследено со незапирлива трансформација и модификација, како циклично поставена енергетска трансмисија на форми и бои во целиот раскош на комплексноста на постоењето“, забележува Роберт Цветковски, историчар на уметноста.