Изложба „Визуелни рефлексии“ на Лазе Трипков во Уметничката галерија во Куманово

„Лазе Трипков е активен пред  македонската и меѓународната уметничка и дизајнерска сцена, познат по својот иновативен пристап кон графичкиот дизајн, како и неговата способност да го интегрира културниот дух на Македонија во својата работа. Како истакнат графички дизајнер и едукатор, влијанието на Трипков одекнува низ сферите на уметноста и дизајнот, инспирирајќи генерации нови креативци“, стои во поканата на организаторот, НУ Музеј Куманово.

Лазе Трипков е графички дизајнер со посебен фокус кон интердисциплинарна уметност и дизајн практики. Моментално е професор по визуелна комуникација и графички дизајн на Факултетот за уметност и дизајн при Меѓународниот балкански универзитет во Скопје. Магистрирал на Академијата за ликовни уметности во Варшава и завршил пост-магистерски студии во мултимедија и дизајн во Академијата за ликовни уметности во Лоѓ. Тој ги истражувал симболите и иконографијата во регионот на Балканот,  како докторант на Фулбрајт. Неговите дела биле изложени на многу изложби и добиле престижни награди како Златна пчела од Московското биенале за плакат и почесна награда од Чешката асоцијација за графички дизајн AUG. Тој бил и поранешен продекан на Факултетот за дизајн и мултимедија во Подгорица, Црна Гора, и директор на Музејот на современи уметности во Скопје.

Сега е кандидат на докторски студии на Факултетот за уметност и дизајн во Чешка Република.

Изложбата ќе биде отворена до крајот на месецот, 29 фебруари.