Ќе нема повеќе директори кои не можат професионално и стручно да одговорат на секојдневните обврски, кажа Меџити за смената на Ивановска

Министерот за здравство Фатмир Меџити, при денешната посета во Здравствениот дом во Куманово не сакаше директно да кажа која е причината за смена на директорката на Општа болница Куманово, Билјана Ивановска само еден месец откако беше изберена на функцијата. 

Тој тврди дека во министерството има нова практика и сите менаџери и здравствени работници, кои непрофесионално и нестручно ја извршуваат работата ќе бидат сменети.

„Во здравството воведуваме нова пракса која ќе ја применуваме, а тоа е професионалност и стручност. Дали еден директор е назначен на конкурс или не, дали бил една недела, еден месец, го почитувам професионализмот и стручноста. Веќе нема да бидат работите како досега. Кај мене нема да има директори кои не можат во целост и стручно да ги извршуваат секојдневните работи. И директорот во Психијатриската болница беше сменет по неполн месец, во Клиничка болница Тетово по три месеци медицинскиот директор си поднесе оставка.  Во моето работење не ме интересира политика и партија. Професионализмот и стручноста секогаш ќе се почитуваат. Од моето доаѓање има разрешено некаде околу 25 менаџери. Се соочуваме со тешки услови во здравството заради недомаќинско работење на менаџери кои биле по 5-6 и 10 години“, кажа министерот Меџити .

На инсистирање на новинарите да каже дали Ивановска е нестручна во својата работа и како го заклучиле тоа за само еден месец, тој повторно го избегна одговорот. 

„Мене не ме интересира која индивидиа од која политичка партија доаѓа, јас сакам стручни и професионални менаџери. Јас треба да се грижам за сите вработени и нема да дозволам мобинг од менаџерите“, додадате министерот.

Тој најави дека до медиумите ќе достави извештај од Државен здравствен санитарен инспекторат со детали за досегашната работа и менаџирањето во Кумановската болница.

Ивановска беше разрешена од министерот пред два дена, а на нејзино место за в.д. директор е назначен урологот Фати Џемаили.