Коледарите ги започнаа подготовките за Бадник, набраа дабови гранчиња во Колитско

Вчера во атарот на селото Колитско ги набраа дабовите гранчиња, кои ќе бидат поделени на граѓаните на 6 јануари. Прославата се организира по 24-ти пат, а секоја година има се поголем одѕив.

„Особено радува што се повеќе млади луѓе се вклучуваат во прославата и ја почитуваат нашата традиција. Тоа беше и нашата цел кога ја почнавме оваа менифестација, да ги сочуваме од заборав нашите традиционални обичаи со кои го прославуваме Христовото раѓање - Божиќ. Собирањето на дабовите гранчињата има посебна симболика, бидејќи посетуваме разни села и ја осознаваме и нивната традиција, притоа се дружиме. Ги повикувам граѓаните масовно да дојдат на градскиот плоштад, заедно да се радуваме на големиот празник и да си посакаме успешна нова година“, изјави Мирослав Доневски, претседател на здружението.

Ова година кумови на Бадник се Зоран Божиновски Данур и Мишко Николовски Библиотека.

Прославата на 6 јануари започнува со собирање на членовите во Касапскиот круг во 10 часот, па се оди во Црквата „Свети Никола“ на литургија и осветување на гранчињата. Потоа се доаѓа на платото пред Центарот за култура, каде ќе се дели погачата со златник и бадниковите гранчиња, по што ќе има пригодна програма и народна веселба.
 
Специјални гости на прославата ќе биде галичката музика - Маевци од Дебар. 

Здружението „Коледари Куманово“ брои над 2.500 члена, кои се активни преку целата година со учество на крводарителски акции, ликовни колонии и други хуманитарни манифестации. Сите активности ги финансираат од сопствени средства.