Зачленете се во нашиот клуб на читатели и најновите текстови ќе ги добивате на вашата мејл адреса
Во малата сала на Центарот за култура „Трајко Прокопиев“ во Куманово, вечерва во 19 часот ќе се одржи концерт „Со звуците на обоата“, во изведба на Гордана Јосифова Неделковска (обоа) и Елена Атанасовска Ивановска (пијано).
Гордана Јосифова-Неделковска дипломира и магистрира на Факултетот за музичка уметност при Универзитетот „Св. Кирил и Методиј“ во Скопје, во класата на проф. Киро Давидовски, а се усовршува на академијата „Моцарт“ во Варшава, Полска и BANFF центарот за музика и звук во Канада, како нивен стипендист. Добитник е на повеќе награди на државни и меѓународни натпревари.
Елена Атанасовска-Ивановска е една од најуспешните и најафирмираните пијанисти во земјава, која активно учествува во музичкиот живот во земјава, но и надвор од неа. Основното и средното музичко образование го завршува во ДМБУЦ „Илија Николовски – Луј“ во класата на проф. Лепа Мрмевска. Дипломира со највисока оцена CUM LAUDE на Факултетот за музичка уметност во Скопје во класата на еминентниот проф. Борис Романов. Во 2005 година завршува постдипломски студии во класата на истиот професор.
Во текот на музичкото образование и творењето и двете уметнички се здобиваат со голем број на признанија и во нашата држава но и надвор од нејзините граници.
Влезот е слободен.