Кумановци од Авганистан се селат на брод

Според податоците на агенцијата “Коузон корпорејшн“ од Скопје во последниве неколку месеци 170 кумановци аплицирале за работа на брод, а 84 си го оствариле сонот.

 Има голем интерес во последно време. Се работи главно за луѓе кои биле во Авганистан и имаат искуство со работа во странство и сега бараат работа на брод.  Тие имаат поголеми шанси да поминат на интервју. Само на брод за еден месец отидоа 84 луѓе од Куманово, а посебно се сметаат другите програми кои ги нудиме. Има интерес за Катар, за Дубаи - вели Атанас Паланов, менаџер за вработување во “Коузон корпорејшн“.

Преку агенцијата “Контекст“ од Скопје десетина кумановски студенти заминале на сезонска работа во Германија и Америка. Тоа се претежно млади луѓе на возраст до 26 години, кои имаат статус на студенти и одлично го познаваат англискиот јазик.

За ваквиот одлив на млади образовани кадри социологот Светлана Илиевска Алексовска вели дека мотивот е борбата за егзистенција.

 Недостигот од работни места, помалку можности за личен и професионален развој, недостигот на почит за стекнатото образование и знаење се главните причини. Немањето просперитет во оваа држава создава револт кај секој млад човек кој бара начин за подобра иднина.  Тие се на товар на родителите и прифаќаат да работат било што, а иднината ја гледаат надвор од земјава - смета социологот Илиевска Алексовска.

Кумановци во изминатите десетина години стана главни печалбари во земјите на Блискиот Исток, откако се покажаа како добри работници. Тоа ја подобри матерјално-финасиската состојба во семејствата и градот, бидејќи платите се движеа од 2 до 10 илјади евра.