Кумановци претпазливи што јадат- се плашат од листерија

Иако не е потврдено официјално кој продукт е изворот на заразата, претпазливоста се однесува на млечните и сувомесните производи.

 - Внимавам што купувам бидејќи јас имам 68 години и сум во ризичната група. Откако слушнав на вести за бактеријата избегнувам месни и млечни производи и повеќе јадам овошје, зеленчук, салати и супи. Подобро да внимаваме отколку да бидеме болни - вели Даниела Крстиќ, граѓанка.

И останатите граѓани велат дека се загрижени поради опасната бактерија од која починаа четворица луѓе.

  - Кога купувам го гледам датумот на производот и производителот. Овошјето добро го миеме пред јадење. Мораме да водиме сметка за здравјето и на децата им кажувам кога излегуваат навечер да не јадат се и сешто - рече Салие Лимани, граѓанка.

Од продавниците и месарниците објаснуваат дека прометот не е намален и дека купувачите не се во паника.

  - Продажбата е иста, но секој си купува според својот џеб. Нашите граѓани купуваат она што е поефтино, колбаси, суџук, салами, шунка, а соседите од Србија кои пазарат кај нас најмногу купуваат печеница - потврдуваат од продавница за сувомеснати производи.

Во маркетите велат дека и онака граѓаните во овој период повеќе купуваат пиперки и домати и не забележале некој драстичен пад на продажбата на месни производи.

Храната за која постојат сомнежи дека има листерија ќе биде тестирана.