Куманово и Старо Нагоричане во заеднички еколошки проект

Проектот го финансира УНДП со 900.000 денари и е во рамките на програмата на Обединетите Нации "Подобрување на меѓуетничкиот дијалог и комуникација помеѓу заедниците".Денеска, во Куманово се одржа првиот информативен ден на кој беа презентирани целите на проектот.

"Проектот започна во февруари и помина низ неколку фази. Прво советите на општините поднесоа иницијатива за заедничка соработка на полето на зачувување на животната средина, по што се формираше заедничко координативно тело, а беше донесена и одлука за воспоставување на заедничка меѓуопштинска соработка "-вели проект менаџерот на проектот, Бобан Бојковски.

 Двете општини имаат обврска да подготват локални еколошки акциони планови кои ќе траат наредните шест години.

"Од особена важност е ваков проект кој овоможува давање насоки за идни еколошки планови. Моја заложба и заложба на Советот на општината на Старо Нагоричане е да реализираме активности со кои нашата Општина ќе стане зелена општина" -рече Миодраг Јовановиќ, градоначалник на Старо Нагоричане.

Надлежните од општина Куманово,велат дека донесувањето на локалните еколошки акциони планови се предуслов за меѓуопштинска соработка.