Меѓународниот тамбурашки фестивал вечерва на Градскиот плоштад во Куманово

На фестивалот ќе настапат повеќе домашни и регионални пејачи и оркестри, а забавата ќе трае до полноќ.

Фестивалот ќе го отвори групата „Табиет“ од Свети Николе, а ќе настапат и Виктор Димитриевски, Боби Зафировски – Амадеус, Наум Петрески и Нино Величковски.

Програмата ќе продолжи со Градскиот тамбурашки оркестар „Пљевља“ од Црна Гора, со солистката Нина Стругар од Подгорица. Завршницата е предвидена со настапот на новосадскиот бенд „Ла Банда“, составен од осум девојки, кои ќе се претстават со богат музички репертоар.

Фестивалот се одржува по 22. пат и е препознатлива музичка манифестација, на која низ годините учествувале тамбурашки оркестри и познати пејачи од регионот и пошироко.

За разлика од претходните години, кога фестивалот се одржуваше три дена, оваа година програмата е само во една вечер.

Фестивалот е поддржан само од Општина Куманово со 450.000 денари, додека изостана поддршката од Министерството за култура.