Млади лица ќе се обучуваат за дефицитарни струки

Дел од кандидатите веќе почнале, а дел допрва ќе почнат со обуката. Проектот го спроведуваат Центарот за вработување Куманово и невладината ДРОМ, а е финансиран од Европската унија. Младите ќе се обучуваат за фризери, чевлари, монтери, гипсери, фасадери, заварувачи и реставратор.

“По завршување на петмесечниот курс ќе полагаат испит, во Работнички Скопје или Штип, ќе видиме, тоа ќе биде изберено на тендер. Компанијата е задолжена во рок од шест месеци да ги задржи тие кандидати. Тоа се лица до 29 години, претежно социјални случаеви, лица со хендикеп и од маргинализирани групи. Опфатени се фирми кои имаат најдобри услови и кои сакаат да примат такви лица“- изјави Ахмет Јашаревски од “ДРОМ“.

Кандидатите месечно ќе примаат по 5500 денари додека трае обуката, а фирмата само еднаш ќе добие 5500 денари надомест.

“По завршување на обуката лицата се стекнуваат со сертификат. Проектот формално од денеска почна да се реализира, договорите се веќе потпишани и лицата се на обука. Проектот е за здобивање со професионални вештини. Проектот е применуван во источно-европските земји, во нашата држава е за прв пат“- вели  Милорад Тренчевски, директор на Центар за вработување Куманово.

Проектот се спроведува во Скопје, Битола, Тетово и Куманово.

“Да најдеме начин, заеднички начин како да ја намалиме невработеноста во регионите и секако во Куманово. Се разбира се соочуваме со одредени потешкотии, ништо не е лесно, но исто така тука сум и да ги охрабрам колегите на некој начин. Гледам луѓе кои се мотивирани“-рече Нијоле Мацкевициене, јуниор проектен менаџер од Литванија и експерт.

Ако овој проект заживее и даде резултати, ќе се спроведува секоја наредна година.