Зачленете се во нашиот клуб на читатели и најновите текстови ќе ги добивате на вашата мејл адреса
Посебниот режим на сообраќај на улицата „Ѓорче Петров“ на влезот во населбата „Перо Чичо“ се` уште трае и се одвива на една коловозна лента, иако реконструкцијата на железничкиот мост е прекината повеќе од еден месец, откако германската фирма „Вибе“ ја повлече својата механизација и ги запре градежни активности на изградба и реконструкција на железничката пруга Куманово - Бељаковце.
Поради зголемениот метеж, граѓаните кои секојдневно по неколку пати мораат да помина по оваа собраќајница негодуваат и бараат решение на проблемот - да се отстранат поставените рампи и семафори со кои се регулира сообраќајот.
„Ваквото одолговлекување и непрофесионално работење е срамотно. Голем број од возачите не ги почитуваат семафорите, па честопати автомобилите се среќаваат на “половина пат“ и може лесно да дојде до верижни судири. Очекуваме што поскоро да се отстрани овој начин на функционирање на сообраќајот, со оглед на тоа дека нема известувања кога ќе се започне со повторно работење на втората страна од мостот“, - реагираат граѓаните.
Од она што може да се види на лице место изграден е потпорниот ѕид само на едната страна на мостот, додека на другата страна само е започната работата.
Од Министерството за транспорт и врски, кога беше стопирана изградбата рекоа дека ќе покренат постапка против германската фирма а работата ќе продолжи наредната година, откако ќе се изврши увид до каде се работите и ќе се распише тендер за избор на нова фирма изведувач.
Кога започна реконструкцијата на железничкиот мост беше најавено дека таа ќе трае неколку месеци.
(Д.Давитковски)
Зачленете се во нашиот клуб на читатели и најновите текстови ќе ги добивате на вашата мејл адреса
