Над 150 кумановци ќе заминат на аџилак

Муслиманските верници ќе заминат на 28 месецов и таму остануваат скоро месец дена. Граѓаните примиле вакцини како превентива од заразни болести пред да тргнат на аџилак.

Ги примив вакцините и не се плашам, се подготвувам за аџилак. Очекувам се најдобро што тргнувам на тоа свето место - вели Реџепи Мемет.

Од туристичките агенции објаснуваат дека оваа година за разлика од лани помал број на граѓани ќе одат на аџилак поради финансиски причини и војната во Сирија.

Сега ќе одат од Македонија до Истанбул, па со авион од Истанбул до Аман во Јордан и од Јордан пак со автобус до Саудиска Арабија. Тие се подготвени, имаме надлежни од агенцијата кои ги придружуваат оџите кои одат натаму, знаат каде да се сместат во хотели, а има и медицински лица - рече Халит Халити од туристичка агенција која го организира превозот.

Саудиска Арабија во јули годинава ги повика постарите лица и хронично болните муслимани да не одат на аџилак, во обид да се запре ширењето на вирусот МЕРС. Триесет и осум луѓе починаа од вирусот сличен на САРС во Саудиска Арабија за неполна година.