Повеќето згради во Куманово немаат противпожарна заштита, покажала вонредната контрола

Инспекциските служби на Општина Куманово одржале состанок со стамбените управители, при што ги задолжиле да извршат вонредни контроли за заштита од пожар во колективните згради во Куманово.

Првичните наоди покажале дека најголем дел од зградите немаат функционална хидрантска мрежа и противпожарни апарати (ПП), а противпожарните скали за евакуација се узурпирани од поединци.

Стамбениот управител „Вектор плус“  вели дека тие извршиле контрола на зградите за кои се задолжени. Најголем недостаток е тоа што ги нема цревата во хидрантите, слична е ситуацијата и со ПП апаратите, а во одредени згради нема ни доток на вода. Според нив тоа е поради застареност на системот, цевките за вода пуклнале, и затоа се исклучени од мрежата.

„Често, поради протекување и поплава во подрумски простории, подземните гаражи и останати заеднички простории, па или е затворен дотокот или е исклучен од мрежата. Сега се потребни поголеми инвестиции и обемна работа да се врати системот во ред. Веќе се преземени мерки онаму каде што има помали недостатоци да ги ставиме во функција, за другите отвараме повици за понуди од изведувачи“, велат од „Вектор плус“.

Неофицијално,  122 згради немаат никаква ПП заштита, и покрај поставени хидрантски инсталации. Загрижува фактот дека стамбените згради направени пред средината на 70- тите години, кога е воведен стандардот за обезбедување на вакви мрежи немаат водоводна инсталација.

Извештаите од извршени вонредни контроли се доставени до Инспекторатот во Општина Куманово, но се уште не е направена конечна анализа на добиените информации. Според надлежностите пропишани во Законот за домување инспекторите за домување можат само да констатираат дали има или нема опрема за ПП заштита.

„Според Закон за домување ние можеме само да извршиме надзор на тоа дали има или нема план за евакуација, хидрантска мрежа и ПП апарати, како и проодност на противпожарни скали и исправност на лифтови. Проверка на нивната исправност и функционалност е должност на ДЗС“, информираше Сељами Ајрлуау, инспектор за домување.

Од Дирекцијата за заштита и спување (ДСЗ)  велат дека ти постапуваат согласно своите законски надлежности, и работата на утврдување на пропустите во однос на противпожарната заштита.

По несреќата во Кочани се зголеми загриженоста за безбедноста на граѓаните поради што се вршат засилени инспекциски надзори во сите градови во државата. Инспекциските служби спроведуваат засилени контроли на угостителски објекти, училишта, градинки, домови за стари лица, интернати и колективни стамбени згради.