Не се мери загаденоста на воздухот во Куманово

Ве известуваме дека мониторинг станицата во Куманово не е во функција поради проблеми со мерните инструменти. Во тек е набавка на резервни делови со што се надеваме во наредниот период по обезбедување на соодветните делови, мониторинг станицата повторно ќе проработи - вели Сашо Секуловски, портпарол во Министерство за животна средина.

Иако нема податоци за квалитетот на воздухот, граѓаните сметаат дека загадување има поради големиот број автомобили во градот.

Загадено е доста. Има многу возила од кои некои стари и по 30 години и тие не задоволуваат еколошки стандарди. Сметот придонесува за загадување. Кога дува ветер не се чувствува ништо, но кога е спарно или има магла, потешко се дише - рече Часлав Младеновски, граѓанин.

За индустриските капацитети се смета дека малку влијаат на загадување на животната средина.

На ниво на држава меѓу најзагадените се вбројуваат Битола и скопските општини.