Oдбележан Денот на крводарителството во Куманово

Општинската организација на Црвен крст Куманово со свеченост го одбележа Денот на крводарителството и 79-годишнината од постоењето на Црвениот крст на Македонија.

По тој повод на крводарителите им беа доделени признанија за особен придонес во една од најхуманите мисии, која спасува живот.

„Особена чест е да го поздравиме  Иван Петрушевски, кој досега 75 пати дарувал крв. Но, морам да напоменам дека сите крводарители мора првин да водат грижа за сопственото здравје и благосостојба за да можат да помагаат на другите. Затоа извршувајте редовни лекарски прегледи, подобро да испуштите една акција, за да подоцна учествувате во многу повеќе“, истакна д-р Нухи Јусуфи, претседател на Црвен крст Куманово.

Тој потенцираше дека има кумановци кои и повеќе од 100 пати дарувале крв, но не се за потценување и оние кои имаат по 50, 25 или 10 дарувања. Секоја соберена единица крв е основата за непречено одвивање на многу интервенции и медицински протоколи кои се спроведуваат во болниците.

Бројката од 50 дарувања, ова година ја достигнале Горан Апсостоловски, Дејан Димитриевски, Драгољуб Добревски, Влатко Јакимовски, Горан Јовановски, Горан Петковски, Бобе Јовановски и Дејан Петковски.

Црвен крст Куманово во текот на минатата 2023 година организирала 27 успешни акции, со соберени 2677 крвни единици. Имаат одлична соработка со Институтот за трансфузиона медицина од Скопје, како и трансфузионото одделение на Општа болница Куманово без чиј ангажман оперативниот дел би бил незамислив.

 Благодарници добија и оние кои организирале успешни крводарителски акции, но дале и сопствен допринос во нив.