Одбележани 71 година од загинувањето на Панче Пешев

Традиционално секоја година, борците му оддаваат почит и се сеќаваат на храброста и придонесот на Панче Пешев во НОБ.

“Панче Пешев е еден од поистакнатите кумановски револуционери, кој има голем удел и значење во развој на народно ослободителното движење во Куманово. Тој е роден во Велес во 1915 година, и на 5 годишна возраст дошол во Куманово каде се образувал. Секогаш бил во првите редови и секогаш не се сложувал со одредените ненародни движења од тој период“- изјави Благе Јакимовски, секретар на Сојуз на борци Куманово.

Претседателот на Сојузот на борци Куманово, Спирко Зафировски рече дека Панче Пешев е голема личност, борец, револуционер за Куманово. Пешев од 1941 до 1943 година интензивно работел со млади луѓе за да се организира и формира одред на Козјачие.

“Во 1943 година околу 26 јуни веќе беше подготвен со доаѓањето на неговите другари, а посебно со доаѓање на Карпош од Кукавичкиот партизански одред, кој имаше големо партизанско искуство и на 26 јуни тие излегоа во партизани. За кратко време делуваа во Јужноморавски одред, а подоцна откако бројно се зголемија, оти од Куманово излегоа десет партизани, се формира партизански одред, а за командант беше одреден Карпош. Во многу борби Панче Пешев учествуваше со Карпош и имаа голем придонес“- рече Зафировски.

Во Мајската офанзива при враќањето со бригадата од Егејска Македонија, загинал во судир со бугарската војска во Кушкулија, струмичко на 5 јуни 1944 година. Во Куманово неговото име го носи Музичкото училиште,  улица, месна заедница и културно-уметничко друштво.