Останаа слободни места во сите средни училишта

Во Гимназијата “Гоце Делчев“ се примени 246 ученици, а остануваат уште 94 слободни места. За второто пријавување на 29 и 30 јуни, бројот на поени останува ист и ќе се примаат ученици со 60 поени, а намалување на критериумите ќе следи за во август.

Во Земјоделското училиште “Киро Бурназ“ се примени 30 ученици, а слободни места има за сите профили.

“Пријавени беа 30 ученици и сите се примени. За второто пријавување од првиот уписен рок поените за упис се намалени за 5 и очекуваме да се пријават и запишат повеќе ученици“ - вели Весна Трајковска, директорка на “Киро Бурназ“.

Во “Перо Наков“ се запишани 76 ученици, и кај нив има слободни места за сите струки.

“Има голем интерес за економските струки, посебно за деловен секретар. Многу од учениците кои се одбиени се на граница и штом ќе се намалат поените, ќе исполнат услови за запишување. За во второто пријавување ќе се намалат поените за 5 за текстилно кожарските струки, а за економските струки намалувањето ќе биде за во август“ - рече Лидија Тасевска, директорка на “Перо Наков“.

Во “Наце Буѓони“ се примени вкупно 254 ученици, што значи дека остануваат 430 слободни места. Комисија ќе одлучува за намалувањето на поените за техничките струки, додека за намалување на поени за прием во медицинската струка потребна е согласност од МОН.