Падна финасискиот извештај на ЈП “Водовод“

Локалната опозиција немаше разбирање за долговите на ЈП “Водовод“ кои изнесуваат 11 милиони денари. Координаторот на советничката група на ВМРО - ДПМНЕ, Мирослав Стојановски обвини дека претпријатието спонзорира спортски клубови, а советничката од ГРОМ Душица Сеизовска Јовановиќ смета дека стариот директор треба да одговори како настанале долговите.

Оваа година има загуба од 11 милиони денари и некој мора да одговара. Не може да не одговара само затоа што се сменил директорот. Па тој не е далеку, тука е во општината - изјави советничката Јовановиќ.

Директорот на ЈП “Водовод“, Горан Стојковски тврди дека големите долгови  настанале поради високата цена на сировата вода, финансиската блокада на претпријатието и големиот број кражби на вода. Според него не е проблем што извештаите не добија поддршка од Советот на Општина Куманово, туку  проблем е тоа што работниците нема да добијат плата пред празниците.

 Најголем проблем е дали ќе успеат вработените да земат плата, да можат тие и нивните семејства да добијат лекување, да можат закажаните операции да се реализираат, да се намират основните потреби пред Нова година. Мене приоритет во овој период ми е да завршиме со одреден прилив на средства за да можеме да исплатиме плата. Ова е политичка одлука. Знаеме дека работиме под блокада и сите средства кои доаѓаат на сметка на ЈП “Водовод“ се префрлаат на сметка на Водостопанство - објасни Стојковски.

Колку за споредба тој вели дека во Скопје сировата вода не се плаќа, во Куманово кубик чини 7 денари, а во другите градови цените се значително пониски.