Пазарот за стари работи од Долно Којнаре ќе се премести на друга локација, најави Димитриевски

Тој објасни дека се бараат алтернативни локации, затоа што паркинг просторот не ги задоволува потребите на граѓаните, а го блокира сообраќајот во деновите кога работи, на прашање на Кумановоњуз.

„Имаме делумно импровизиран паркинг простор кој е под владение на ЈП „Пазариште“ и не ги задоволува потребите на тој пазар, кој го нарековте „бувљак“. Се бараат алтернативни решенија тој пазар во иднина да биде дислоциран на друга локација. Една од можностите е да биде преместен на Спортскиот аеродром Аџи Тепе, за времена намена за да може да се растетери овој простор овде за основната намена - а тоа е добиточен пазар“, кажа Димитриевски.

Жителите од тој дел на градот често реагираат поради големиот сообраќаен метеж кој ги блокира тротоарите, но и влезовите во дворите и куќите. Истовремено се блокирани и улиците, а често се случуваат и мали незгоди, караници кои го реметат мирот на улицата. Функционирањето на овој пазар во деновите од викендот, сабота и недела, создава големи количини на смет, што од продавачите, што од посетителите.