Пчиња се излеа кај Пелинце и Стрновац

Според Регионалниот центар за управување со кризи (РЦУК), реката Пчиња накратко излегла од коритото на овој потег, но без да нанесе штета. Мостовите во Коинце и Пелинце се расчистуваат од насобрани дрвја и отпад, без констатирана опасност по нивната стабилност.

РЦУК синоќа информираше дека, поради обилните врнежи од дожд, во подрачјето на селото Пелинце, во близина на Меморијалниот центар АСНОМ, како и кај бањата Стрновац, реката Пчиња се излеала од своето корито за околу 20 сантиметри. Според првичните информации, водата засега не зафаќа ниту куќи ниту викендици.

Дополнително, кај Коинскиот мост е забележано големо количество насобрани дрвја кои го попречуваат нормалниот проток, што дополнително ја усложнува состојбата на теренот. За ситуацијата е известено Водостопанство Куманово, кое ќе постапи согласно своите надлежности.

Утринава во сливот на река Пчиња е забележано зголемување на водостојот во долниот дел од реката, но без опасност од излевање, соопштуваат од Министертсвото за земјоделство, шумарство и водостопанство .