Повеќето јавни институции и претпријатија ќе се грејат на гас, ќе имаме ли зимоска почист воздух во Куманово

Најголемиот загадувач Општа болница Куманово има склучен договор за користење на гас за грејната сезона 2023/2024, како и голем дел на другите институции.

„Општина Куманово, Библиотеката „Тане Георгиевски“, Гимназијата и Економското училиште, основните училишта Кочо Рацин, Браќа Миладиновци/Крсте Мисирков, Бајрам Шабани, 11 Октомври, Градинката „Ангел Шајче“, Домот за стари лица „Зафир Сајто“, повторно се враќаат како корисници на природен гас. ЈП Водовод никогаш не ни прекина. Тоа е добро секако за претпријатието, но и генерално за квалитетот на воздухот во градот кој сите ние и нашите семејства го дишеме“, изјави Марко Митровски, директор на Куманово-гас.
           
На гасоводната мрежа не се приклучени Основниот суд Куманово, објектот на Пошта, Музичкото училиште, училиштата Вук Караџиќ и Наим Фрашери, јавните претпријатија Пазариште и Чистота и зеленило и тие ќе се грејат на масло за горење, додека дрва ќе коритат училиштата од околните села како и Противпожарната единица на Куманово. Зградата на СВР Куманово не е приклучена на гасоводната мрежа.

Граѓанската иницијатива Шанса за Центар мапираше 700 јавни објекти низ цела Македонија - болници, градинки, училишта, касарни, судови... и други установи кои користат нафта и мазут, а во Куманово се потенцирани околу 25 загадувачи од јавниот сектор.