Повисоки сметки за ѓубре ќе плаќаат граѓаните на Куманово

Најголемо поскапување за дури 50 отсто ќе има за домаќинствата во градското подрачје, кои наместо 3 денари ќе плаќаат 4,5 денари по метар квадратен стамбен простор. За жителите на приградските населби поскапувањето ќе биде од 2 на 3 денари, а правните субејкти од 10 на 12,5 денари за метар квадратен.  

Предлогот за зголемување на цените за собирање на сметот го поднесе ЈП „Чистота и зеленило“, со образложение дека се зголемени цените на енергенсите, нафтата, како и минималната плата.

Граѓаните се жалат дека зголемувањето на цената доаѓа во време на голема економска криза и кога семејниот буџет е се потенок. Тие бараат од претпријатието да го зголеми нивото на хигиена во градот, одржувањето на зелените површини и динамиката на изнесување на смет од домаќинствата.

Вчера беше дадена поддршка и за зголемување на бодот на платите на вработените во ЈП „Чистота и зеленило“.

Одлуката ја донесе мнозинството во Советот на Општина Куманово, предводено од коалцијата „За наше Куманово“, ВМРО-ДПМНЕ, Алијансата на Албанците и Беса.