Зачленете се во нашиот клуб на читатели и најновите текстови ќе ги добивате на вашата мејл адреса
„Оваа година, Хрватска и Македонија одбележуваат 30 години од воспоставување дипломатски односи, што ќе биде сјајна прилика да ја продлабочиме соработката, а за тоа постојат големи можности и потенцијали, не само на државно ниво, туку и на ниво на градови и општини“, рече амбасадорката на Република Хрватска во Македонија , Нивес Тигањ при денешната прва посета на Општина Куманово.
Амбасадорката потенцираше дека повторно треба да се воспостави и развива соработката помеѓу Куманово и Вараждин или некоја друга хрватска општина за да се развиваат градови на пријателство и соработка помеѓу двете пријателски држави.
„Хрватска има големо искуство во искористувањето на европските фондови, што може да биде од корист за македонските општини, меѓу кои е и Куманово. Истовремено, Хрватска е поддржувач на европскиот пат на Македонија и дава огромна поддршка во процесот на европска интеграција, конечно добивање на датум и одржување на прва меѓувладина конференција“, истакна Тигањ.
На средбата со градоначалникот на Општина Куманово Максим Димитриевски се разговарало за економските можности, културната соработка, здравството и други области за зајанување и унапредување на традиционално добрите односи и меѓусебната поддршка.
„Куманово има одлична соработка со хрватската заедница во општината, чии претставници се вклучени и во Комисијата за односи меѓу етничките заедници. Организираме голем брoј на културни манифестации во кои учествуваат хрватски друштва, а и во иднина ќе продолжиме да ја унапредуваме соработката. Република Хрватска е голем поддржувач на нашата држава за членство во ЕУ, таа е реален пријател и ова пријателство ќе продолжиме да го негуваме“, истакна градоначалникот Димитриевски.
Тигањ му посака на Димитриевски остварување на ветувањата и заложбите од областа на економијата и плановите за инфраструктурни проекти.
Зачленете се во нашиот клуб на читатели и најновите текстови ќе ги добивате на вашата мејл адреса
