Пред автобуската станица ќе се уреди постојка за патници на градскиот превоз

Просторот пред Автобуската станица во Куманово ќе се уреди и ќе се користи како стојалиште за патници кои го користат градскиот линиски превоз.

Поради тоа што сега нема уредено стајалиште се чека и се излегува од автобус буквално на улица, што е небезбедно како за патниците така и за другите учесници во сообраќајот. (Фото: Кумановоњуз)

Советот на Општина Куманово на последната седница ја подржа Предлог-одлуката за давање на согласност за управување на времено автобуско стојалиште, откако претходните неколку месеци имало бројни реакции од сограѓаните и родители на ученици, поради несоодветните услови за користење на автобусите на линиите со број 2, 5 и 13.

„Децата  беа принудени да чекаат автобуси, да се симнувањаат и качувааат во автобус буквално на улица. Се работи за локација спроти Автобуската станица или поточно пред ресторанот „Буѓо“. Укажувањата на родителите е дека е опасно, неосветлено и небезбедно се издржани, сериозни и ургентни.  За овој проблем е дискутирано и на состаноците со општинската администрација“, изјави Елена Доцевска Божиновска, советник.

По овие укажаувања веднаш било интервенирано и во најкус можен рок е обезбедена техничката документација, сообраќаен проект со дефинирана хоризонтална и вертикална сигнализација и сообраќајно уредување, како и согласност од МВР.

„Со ова одлука ќе овозможиме безбедно и непречено одвивање на сообраќајот. Патниците кои користат градски и приградски линии, особено учениците ќе имаат безбедно место на кое ќе се симнуваат и од кое што ќе тргнуваат или, пак, ќе ги чекаат автобусите“, заклучи Божиновска.

Одлуката е донесена со 21 глас за и еден воздржан.

Просторот пред автобуската станица е во сопственост на Општина Куманово, кој подолго време  се користи како паркинг простор за возилата од околните објекти и коцкарници, и е целосно неуреден и запуштен.