Претседателот Пендаровски посети семејна фарма во „Четирце“

Во разговорот со сопственичката Сања Димковска, претседателот Пендаровски бил запознаен со капацитетите на фармата, начинот на одгледување на животните и пласманот на нивните производи.

„Споделувајќи ги досегашните искуства, Сања посочи дека пред неколку години решила да се откаже од тогашната професија и да се посвети на домашниот бизнис, да продолжи по стапките на родителите кои околу две децении се занимаваат со сточарство. Нејзиниот современ пристап, преку непосредна комуникација и дигитален маркетинг, придонел за значително зголемување на продажбата. Со традиционалниот метод на одгледување кокошки на отворени пасишта, фармата „Четирце“ најчесто и не ја задоволува побарувачката“, велат од кабинетот на Претседателот.

Препознавајќи го интересот за проверени и здрави прехранбени продукти, освен примарната живинарска и свињарска дејност, Димковски, во текот на изминатава година, започнале и да приготвуваат и да продаваат домашна храна.

Нагласувајќи го придонесот на жените претприемачки од руралните средини, претседателот Пендаровски изрази задоволство што примерот на Сања поттикнува и охрабрува млади луѓе да веруваат во својот потенцијал и да дадат значаен придонес во нашето општество.