Приведени две лица за кријумчарење на 40 мигранти пронајдени во Горно Којнаре

Одделот за сузбивање на организиран и сериозен криминал при МВР до надлежното ОЈО за гонење на организиран криминал и корупција поднесе кривична пријава против М.А.(27) и А.Х.(20), двајцата од Пакистан, поради постоење основи на сомнение за сторено кривично дело „криумчарење мигранти“, по член 418-б од Кривичниот законик.

Како што информираат од МВР, на 22.12.2021, по преземени мерки и активности на автопатот Куманово – Табановце, во напуштени објекти во село Горно Којнаре, кумановско, полициски службеници од Одделот за сузбивање на организиран и сериозен криминал пронашле 40 лица – мигранти од кои 21 лице од Индија, 15 од Сирија, две од Пакистан, и по едно лице од Мароко и Турција.

Меѓу откриените лица, тројца од нив биле малолетни. Било утврдено дека М.А. и А.Х., кои биле дел од групата, ја организирале групата и за финансиски надомест на лицата требало да им организираат илегален премин на македонско- грчката граница.

Во текот на денот М.А и А.Х. ќе бидат изведени пред судија на претходна постапка, додека останатите лица се сместени во Прифатен центар.