Промоција на „Лексикон на странски сликари во Македонија“ и изложба на слики во Занаетчискиот дом во Куманово

Колекцијата на слики е на автори од Австрија, Германија, Франција, Велика Британија, Србија односно Југославија и други земји, а 40 слики за прв пат ќе бидат изложени пред македонската публика.

Во лексинконот се вложени 20 години на колекционарство и истражување, и две години напорна работа во подготовка на книгата. На нешто повеќе од 400 страници, во книгата се наoѓаат повеќе од 250 биографии на странски сликари и повеќе од 500 фотографии со репродукции од нивните македонски дела.

„Лексиконот ја раскажува историјата на Македонија на еден поинаков начин – низ призмата на уметниците кои ја посетиле во периодот 1850-1950. „Лексиконот“ е замислен да биде мост помеѓу историјата и културното наследство на Македонија. Книгата има за цел да ја престави Македонија не како „балканско јаболко на раздорот“ или „буре барут“, туку како уметничка муза и инспирација со која сите ние треба да се гордееме и да ужуваме во тој наш заеднички културен аманет“,  стои во описот на книгата.

Влатко Милошевски е пасиониран трагач и колекционер на ликовни уметнички дела. Во приватната колекција на Милошевски се наоѓаат повеќе од 200 оригинални уметнички дела, ретки печатени материјали, репродукции и уметнички книги, што ја покриваат работата на странските сликари во Македонија во периодот помеѓу 1850 ‒ 1950 година.

Зоран Андонов е новинар кој во изминативе триесеттина години работел во повеќе редакции и медиуми во Македонија. Како новинар работеше на техничко и стилско уредување на бројните текстови од биографиите на сликарите за кои се зборува во Лексиконот.