Промовирана стихозбирката „Ехо на љубовта“ од Никола Митовски

Во преполната сала на Општина Крива Паланка, синоќа беше промовирана стихозбирката „Ехо на љубовта“ од Никола Митовски.

Митовски (17), кој веќе е препознаен по својот младешки, но зрел поетски израз, ја отвори својата книга како врата кон сопствениот свет – полн со љубов, искрени чувства, размисли за животот и мечти што ја бојат младоста.

Во своето обраќање, тој изрази огромна благодарност кон сите што му помогнале во реализацијата на неговиот сон, а посебно до градоначалникот на Крива Паланка, Сашко Митовски, за финансиската поддршка, како и до неговата мајка, професорките, рецензентите и промоторката.

„Ова не е само промоција, туку исполнување на еден сон, една визија, една желба. Ви благодарам што сте тука да го споделите овој важен момент со мене. „Ехо на љубовта“ е книга што ја носи пораката дека вистинската љубов никогаш не исчезнува – таа одекнува низ времето, низ сеќавањата, низ зборовите што ги оставаме зад себе. Се надевам дека во оваа книга ќе најдете дел од вашата приказна. Ако барем еден стих, барем една реченица ви прозвучи познато, тогаш знам дека оваа книга ја исполнила својата мисија,“ истакна Митовски.

Промоторката, поетесата Емилија Колевска, зборуваше за емоционалната длабочина и зрелоста што ја носи поезијата на авторот.

„Ведрината, емотивноста и младешкиот занес кои младите ги носат со себе, а неизмерно им се потребни на повозрасните или позрелите, вечерва промотивно одекнува низ страниците на првата стихозбирка на Никола. Поезијата претставува крик од душевни вознеси и емоции, а Никола тоа го прави вешто преку реминисценција на опеаните вонвременски љубови на Петре М. Андреевски, преку Петрарка, Бокачо, Рацин, Прешерн, но пред сѐ преку гласот на своето срце,“ нагласи Колевска.

Рецензентката Соња Гаврилова, авторка и членка на Клубот на писатели „Коста Солев Рацин“ – Велес, ја нарече „Ехо на љубовта“ освежување за македонската поезија:

„Оваа стихозбирка внесува младешка енергија и нова перспектива во современата македонска лирика. Темата на љубовта е неисцрпна, но начинот на кој Митовски ја обработува носи свежина и длабочина,“ истакна Гаврилова.

На крајот, рецензентката Оливера Станковска ја заокружи вечерта со зборови инспирирани од стиховите на авторот:

„Само љубовта, онаа силна и безусловна, која е светлина во темнината, може да нѐ поведе на патот до среќата.“

Книгата „Ехо на љубовта“ е достапна во издавачката куќа „Збор“, како и преку онлајн нарачка или директно кај авторот.

Никола Митовски, покрај тоа што е поет, е и активен младински активист, член на Советот на млади на Крива Паланка, новинар во „Тин тим“, како и дел од средношколската заедница на СОУ „Ѓорче Петров“. Со својот ангажман, тој веќе остава трага не само во литературата, туку и во младинскиот активизам.

Промоцијата привлече голем број љубители на поезијата, пријатели, професори, културни работници и новинари, кои со восхит ги слушаа стиховите на младиот автор.