Рома Труба Фест вечерва и утревечер на Градскиот плоштад во Куманово

Годинава фестивалот се одржува по 22. пат, а ќе настапат 10 оркестри од Македонија, Србија, Бугарија и Франција.

Химната на Ромите ќе ја отпее Бернад Демирели од Скопје, а на фестивалот ќе настапат и Виктор Димитриевски и Ивона Јовановиќ од Куманово.

Првата вечер пред кумановската публика ќе се претстават оркестрите на „Кеми Асанов“ и „Кочани“ од Македонија, „Исидор Зечировиќ“ и Маријан Крстиќ од Србија и Панајот Кирилов од Бугарија и оркестарот „Louis Brandalous“ од Франција. 

Втората вечер се предвидени настапите на Демир Кантуровски и Уска Кан Кантуровски Оркестар, Оркестар „Бобан“, Екрем Мамутовиќ и „Нови Надежи“ од Србија, како и Оркестарот на Давид Антиќ.

„Сите оркестри ќе изведуваат изворни ромски песни и ора. Се потрудивме и направивме одлучен избор. Сите оркестри се квалитетни, можеби оваа година е со најсилен состав, и верувам дека публиката тоа ќе го препознае. Оркестрите ќе имаат настап од по 25 минути, по слободен избор“, кажа уметничкиот директор Самет Салиевски.

Фестивалот го организира Културно-уметничкото друштво „Рушид Шакир“ од Куманово.

Почетокот е закажан во  20 часот.