Зачленете се во нашиот клуб на читатели и најновите текстови ќе ги добивате на вашата мејл адреса
Скршени автомобили, откорнати дрвја и скинати кабли од електрична мрежа, е билансот од попладневното невреме што го зафати кумановскиот регион.
Според информациите од подрачната единица на Регионалниот центар за управување со кризи, силниот ветер проследен со дожд откорнал дрво, кое паднало врз автомобил на улицата "Моша Пијаде". При тоа била предизивикана штета и на електрични кабли.
Дознаваме дека неколку автомобили се оштетени и во близина на комплексот Стара Бања и пред Ургентниот центар, откако врз нив паднале дрвја и скршени гранки.
Оштетувања на електричната мрежа има и во близина на земјоделското училиште во Долно Којнаре, во населбата "Иго Тричковиќ" и на улиците "Б.Б Гуцман" и "Индустриска", поради што избувнале пожари, кои навреме биле изгаснати.
Во општина Старо Нагоричане невремето било проследено со град со големина на орев, кој паѓал повеќе од 10 минути, и при тоа биле уништени земјоделските култури. Ветрот откорнал дрвја на локалниот до село Војник и во близина на селото Драгоманце.
Екипи на јавното претпријатие "Македонија Пат", од Куманово, интервенирале на регионалниот пат Куманово-Свети Николе, каде се чистат наноси и одрони од водата, и на магистралниот пат Куманово - Крива Паланка се расчистуваат паданти гранки.
Поради невремето без струја останаа повеќе кумановски села, како и населбите Карпош и Доброшане.
Невремето во Куманово започна по 16 часот, а траеше до 19 часот.
Зачленете се во нашиот клуб на читатели и најновите текстови ќе ги добивате на вашата мејл адреса
