Со мало задоцнување започна екстерното тестирање

Денеска се тестираат учениците почнувајќи од четврто одделение, па се до трета година средно образование.

“Кога требавме да започнеме се случи да немаме интернет. Што е најинтересно, никаде во зградата нема интернет, па не можеме рачно да ги преземеме тестовите. Ќе видиме како ќе се организираме. Најверојатно ќе мора некој од дома да оди, да ги преземе тестовите, но рачно да се ставаат од компјутер на компјутер тестовите тоа ќе потрае. Денеска имаме 249 ученика за тестирање“ - изјави Милена Стефановска, администратор во “Браќа Миладиновци“.

И во Гимназијата “Гоце Делчев“ поради технички проблеми, екстерното тестирање почна подоцна. Во ова училиште ќе се тестираат 264 ученици.

“Поради проблеми со интернетот почнавме малку подоцна. Учениците имаат 60 минути за да одговорат на 30 прашања. По завршувањето на тестирањето ќе ја знаеме точната бројка на отсутни ученици“ - рече Горан Димитријевиќ, директор на Гимназија “Гоце Делчев“.

Од Земјоделското училиште “Киро Бурназ“ објаснуваат дека кај нив екстерното тестирање почнало навреме и се тече нормално.

“Почнавме во 9.30 часот и вториот термин е во 11 часот. Се тестираат денеска 182 ученици. Засега се се одвива добро, нема проблеми и се надеваме дека така ќе биде и во текот на денот“ - вели Весна Трајковска, директорка на “Киро Бурназ“.

Екстерната проверка на постигнувањата на учениците и проверка на објективноста на оценувањето на наставниците, ќе се реализира во периодот од втори до десетти јуни.