Стотици ученици се вклучија во еколошката акција „Генералка викенд“ во Куманово

Во акцијата учествуваа ученици од основните и средните училишта, институции, граѓански здруженија и невладини организации.

Се чистеше просторот пред Градскиот базен, спортската сала и долж кејот.

„Оваа година акцијата беше најмасовна, со околу 500 ученици и професори од сите училишта во градот. Радува фактот што интересот за ваквите акции е голем. Но, најважно е да се зголеми свеста кај граѓаните, бидејќи таа сè уште е на ниско ниво. И покрај зголемениот број поставени контејнери и корпи за отпадоци, околу нив често има купишта смет. Апелираме граѓаните да ја чуваат животната средина“, изјави Александра Протиќ, раководителка на Одделението за животна средина и природа во Општина Куманово.

Акцијата „Генералка викенд“ ја организира „Man and Mountain LLC“ од Австрија, со поддршка од ЈП „Чистота и зеленило“ – Куманово.

Во акцијата учествуваа и претставници на општинската администрација и Советот на Општина Куманово.

Еколошки акции денеска организираа и училишта, установи и институции.  

Целта на акцијата е преку грижа за животната средина и заедничка одговорност да се подигне колективната свест и да се создадат подобри услови за живот за сите.