Мени

Светот ни се смее за проблемот со кравите, дајте ми законски механизам да ги тргнам од улиците, побара Митовски

16.11.2026 16:46 | KumanovoNews

Градоначалникот на Општина Крива Паланка Сашко Митовски на денешната прес-конференција побара од Владата и од Агенцијата за храна и ветеринарство (АХВ) итно да утврдат правен механизам со кој локалната самоуправа ќе може да ја координира акцијата за отстранување на добитокот од улиците и имотите на граѓаните.

Светот ни се смее за проблемот со кравите, дајте ми законски механизам да ги тргнам од улиците, побара Митовски

Доколку се обезбедат законски услови, тој вети, дека ќе подготви протокол и оперативен план и ќе ја спроведам акцијата за помалку од 10 работни денови.  

Проблемот со кравите во Крива Паланка стана тема и во светските медиуми. Дел од кравите преминале и на територијата на соседните држави.

„Во меѓувреме светот ни се смее, не само на Крива Паланка, туку и на Македонија, држава која има закони, институции, инспекции, агенции и министерства, а со години не успева да реши проблем со крави кои неконтролирано се движат по улиците. Ова е понижување за сите нас, а најмногу на луѓето чии имоти се уништуваат и трпат штета, и плаќаат за немоќта на органите. Сакам да го прекинам овој срам и конечно да го решиме овој проблем“, кажа Митовски.

Според него, оваа постапка треба да се реализира во соработка со надлежните институции и под ветеринарен надзор. 

Митовски вели дека, префрлањето на одговорноста меѓу институциите не дава конкретен резултат, поради што повика на заедничко постапување. 

Агенцијата за храна и ветеринарство уште во 2024 година издаде наредба за одземање на стадото од тројцата сопственици, но таа досега не е спроведена.

Митовски минатата недела побара од Владата да биде прогласена 30-дневна кризна состојба на територијата на Општина Крива Паланка, и да се обезбедат потребните ресурси за трајно решавање на проблемот со неконтролираното движење на крупниот добиток, но тоа не беше прифатено.