Вo регионот најмногу се одгледува пченица и компир

Произведени се 43.693 тони пченица и 15.222 тони компири, покажуваат податоците на Државниот завод за статистика. Другите житарици и градинарски култури во 2013 година биле со далеку помало производство.

 - Луѓето ги засадуваат оние култури кои се рентабилни, за кои лесно може да се обезбеди пласман, се обработуваат машински и помалку се прскаат. Секоја култура бара вода, но градинарските култури се специфични по тоа што бараат почесто наводнување и се по подложни на болести - вели Светлана Скрижевски, агроном.

 Стојко Ивановски, секретар во Здружение на земјоделски производители Куманово објаснува дека последниве 2 - 3 години компирот има добра цена, а пченицата има долга традиција во овој крај.

  - Компир се сади во козјачие, паланечко, во некои планински села. Пченица има од село Степанце кон Куманово на големи површини и неа ја засеваат за продавање, но и како основна храна. Пченка има многу помалку затоа што таа не вирее без вода и ако годината е сушна дава слаб род - смета Ивановски.

Во нашиот регион лани се произведени само 58 тони тутун, 123 тони краставици, 2806 тони домати, 2177 тони кромид, 3147 тони пиперки и 8381 тон пченка.